Kagame yaciye ururimi rw’igifaransa mu gihugu muri 2009. Ubu muri 2022 – ari kuririmbira igifaransa ngo kigaruke. Ni iki cyateye ikitabashwa cyacu ubundi kitajya cyumva ukuri kwisubiraho ?

David Himbara

Kuba Jenerali Paul Kagame agira uburezi ay’ifundi igira ibivuzo bigaragaza ko adaha agaciro na mba ubutunzi bw’ubumenyi habe no kwita ku hazaza h’urubyiruko rw’u Rwanda. Ubusanzwe uyu mugabo ni umuntu uharanira inyungu ze ku giti cye atitaye ku iterambere rihamye,rirambye ry’ubukungu bw’igihugu. Mbisubiremo, udafite abantu ho igishoro – ari byo kubaha uburezi, ubumenyi, ubumenyi ngiro,ubuhanga n’ubuzima bwiza – abaturage b’igihugu ntibashobora guteza imbere ubushobozi bwabo bwite, kandi na bwa bukungu jumba ntibushobora guhindura ubuzima bw’igihugu ngo kibone umusaruro n’iterambere rirambye.

Ikitabashwa kiyoboje u Rwanda inkoni y’icyuma rero cyo gitekereza macuri – cyaraje gisenya uburezi bwari busanzwe butanakomeye cyane,gituma tugira urubyiruko rubarirwa muri za miliyoni rudafite icyizere cy’ejo hazaza. Mu mwaka wa 2009, Jenerali Kagame yahinduye gahunda yose y’uburezi ayishyira mu cyongereza, aca burundu kwigisha no kwiga mu gifaransa no kugikoresha mu bikorwa byose by’uburezi.

Nyuma y’uwo mwanzuro ukakaye yafashe asa nk’uhumirije,aho agaruriye akenge yabonye ko nta barimu bafite ubushobozi bwo kwigisha mu cyongereza bari mu Rwanda. Mu mwaka wa 2010, yatangiye gahunda yo kwinjiza abarimu b’ururimi rw’icyongereza baturutse muri Uganda na Kenya. Nyuma y’igihe gito, Kagame yabuze amafaranga yo kubahemba abishingukamo barataha.

Mu mwaka wa 2022, Jenerali wacu uyu yerekeje amaso mu bihugu byo mu majyepfo ya Afurika,akura abarimu b’icyongereza muri Zimbabwe abaha akazi mu burezi bw’ibanze, uburezi bw’ikoranabuhanga n’imyuga, n’amashami y’ubuzima.

Ariko mu gihe abarimu bo muri Zimbabwe bari bakiri mu nzira abandi bashyika mu Rwanda muri 2022, n’abarimu b’igifaransa bari mu nzira baza. General Kagame yahise akata ikorosi ahindukira mu buryo butangaje, amera nka ya ngurube igarutse mu birutsi byayo. Amaze kwakira amafaranga n’amabwiriza avuye mu Bufaransa, yahise atangiza gahunda y’igihugu yo kwigisha igifaransa mu Rwanda hose mu rwego rwo kwigisha igifaransa mu byiciro byose by’uburezi, kuva mu mashuri abanza kugeza muri kaminuza.

Abarimu b’igifaransa bagera kuri 45 bamaze kugera mu Rwanda bavuye muri Benin, Burkina Faso, U Burundi, Cameroun, Côte d’Ivoire, DR Congo, Ubufaransa, Gabon, Guinea, Mali, Senegal na Togo.

Uko ururimi rw’Igifaransa ruzashyirwa mu buryo bwihuse muri gahunda yose y’uburezi bw’u Rwanda, bisobanurwa neza n’ikigo cy’u Bufaransa gishinzwe gutanga imfashanyo cyitwa Agence Française de Développement (AFD),kigira kiti:

“Inkunga ya miliyoni 5 z’amayero (hafi miliyari 5.7 z’amafaranga y’u Rwanda) izafasha mu guhuza no kugenzura gahunda y’igihugu yo kwigisha no kwiga igifaransa. Ni gahunda y’uburezi bw’igifaransa, igamije guteza imbere uburezi n’ubumenyi bw’Igifaransa mu mashuri yose. Ubuyobozi bw’ikigo cy’igihugu gishinzwe ubumenyi bw’ikoranabuhanga (Expertise France) buzakora kandi bukurikirane ishyirwa mu bikorwa ry’iyi gahunda, nk’umufasha wa tekiniki muri Minisiteri y’Uburezi.”

Ni gute ikigo cy’u Bufaransa, Expertise France, “gikora kandi kigenzura ishyirwa mu bikorwa ry’iyo gahunda,” nk’umufasha wa tekiniki muri Minisiteri y’Uburezi y’u Rwanda? Tekereza amafaranga – kuri Jenerali Kagame, byose ni ifaranga. Gukabya gukunda amafaranga ni cyo cyatumye ingabo z’u Rwanda zihinduka Wagner muri Africa – mbese ni nka ba barusiya b’abacancuro barwana intambara hirya no hino bakorera ifaranga.

“Wagner” ya Jenerali Kagame kuri ubu iri guharanira inyungu z’U Bufaransa muri Mozambique, harimo n’ishoramari rya TotalEnergies rya miliyari 20 z’amadolari ya Amerika ryari ryarahagaritswe n’umutwe w’abarwanyi ba Islamic State.

Ibi byatumye u Bufaransa bufungura selumu bwari bwarafunze,bwemera kongera kumuha inkunga. Inkunga UBufaransa bwahaga u Rwanda yavuye kuri zero igera hafi kuri miliyoni 539 z’amadolari (miliyoni 500 z’amayero) mu gihe cy’imyaka ya 2019-2023. Ibi bikaba ari byo byatumye ururimi rw’Igifaransa rwari rwaraciwe mu Rwanda rugarurwa shishi itabona nyuma y’imyaka 14.

Ni gute iyi gahunda yo kuvurugavuruga uburezi bw’u Rwanda izagira ingaruka? Kagame nta cyo bimubwiye ko uburezi bugiye kongera kuba agatogo nanone. Niba hari ikintu cyerekana ko ikitabashwa cyacu kitajya rwose kibuzwa ibitotsi n’uburezi bw’u Rwanda ndetse n’ahazaza h’igihugu mu myaka myinshi iri imbere,ni iki kintu cyo kuvuruga uburezi akabugira ay’ifundi igira ibivuzo ntacyo yitayeho.

Ijisho ribera kurora