Ingabo za MONUSCO zasinye: « Umutwe wose w’inyeshyamba uzagerageza kutwitambika tuzawuha isomo »! Operasiyo yiswe « Springbok» yatangiye akazi!

Noblesse Dusabe

Ingabo za MONUSCO zivanze n’iza Leta ya RD Kongo muri operasiyo batangije yiswe SPRINGBOK.Ibyo bisirikare byombi byiyemeje gukumira umutwe w’inyeshyamba za M23 ushaka gufata umugi wa Goma n’uwa Sake.

MONUSCO yatangiye akazi gashya muri iyo operasiyo « SPRINGBOK».

Umukuru w’ingabo za MONUSCO Général de Corps d’Armée Otávio Rodrigues de Miranda Filho kuri uyu wa mbere tariki 6 ugushyingo 2023 yagize ati « umutwe wose w’inyeshyamba uzagerageza kutwitambika tuzawuha isomo »! Ngo biteguye kurinda abaturage b’umugi wa Goma.Ntugomba kwigarurirwa n’izo nyeshyamba. Basinye bararahira barirenga.

Ayo magambo yo guhumuriza abaturage ba Goma uyu mu General yayavugiye ku birindiro bishya bya Operasiyo SPRINGBOK biri i Sake, ku birometero 30 uvuye i Goma,muri teritwari ya Masisi aho bagomba kurindira cyane umutekano.

Général de Corps d’Armée Otávio Rodrigues de Miranda Filho

Operasiyo « Springbok » yatangiye: ibi birindiro biri i Kimoka, ku birometero 2 uvuye i Sake,ku ihuriro Kilolirwe-Kitshanga.

Général de Corps d’Armée Otávio Rodrigues de Miranda Filho yagize ati « Umuryango w’Abibumbye waduhaye inshingano zo kurinda abaturage ba Repubulika iharanira demukarasi ya Kongo. Ingabo zacu zoherejwe kuri uru rugamba,hano, bavuye mu bigo byabo basanzwemo, kuko biteguye no gupfa, ariko bakarinda abenegihugu. Umutwe wose w’inyeshyamba uzagerageza kutwitambika tuzawuha isomo. Ni ngombwa ko mwese mumenya ko ingabo z’Umuryango w’Abibumbye MONUSCO zasabwe gufatanya n’ingabo z’igihugu,FARDC. Kuva ubu,aho FARDC izadukenera hose, tuzajyayo kubaha umusaada ufatika, tuzakorana na FARDC, tuzatera inkunga zose zishoboka FARDC nta kindi … »