U Burundi budahawe abashatse gutembagaza ubutegetsi baryamye mu Rwanda,nta mupaka uzafungurwa.

October 9, 2021

Abarebye: 3,170

Guverinoma y’u Burundi iracyatsimbaraye ku mwanzuro yafashe usaba iy’u Rwanda kohereza abakekwaho kugira uruhare muri “Coup d’état” yari igamije guhirika ku butegetsi Pierre Nkurunziza mu 2015 u Rwanda rubitse.

Hashize igihe u Burundi bushinja u Rwanda gucumbikira abakekwaho kuba inyuma y’umugambi wo gushaka guhirika ubutegetsi bwa Pierre Nkurunziza wari perezida w’u Burundi.

Byageze n’aho Umuvugizi wa Guverinoma y’u Burundi avuga ko igihugu cye kigiye kwifashisha amahanga kugira ngo agire uruhare mu kotsa u Rwanda igitutu ngo rwohereze abo bantu.

U Rwanda rwo rwavuze ko rudashobora kubohereza mu Burundi kuko ngo byaba binyuranyije n’amategeko mpuzamahanga gutanga impunzi,ariko Burundi yo ikavuga ko atari impunzi ahubwo ari abakoze ibyaha bashakishwa n’inkiko za Repubulika y’u Burundi. U Rwanda rwarabimanye,gusa rukizeza u Burundi ko rudashobora kwemera ko bifashisha ubutaka bwarwo ngo baruhungabanye.

Ibi ariko u Burundi ntibubikozwa kuko Umuvugizi wa Minisiteri y’Umutekano mu Burundi, Ines Sonia Niyubahwe, yavuze ko kuba u Rwanda rutarashyira mu bikorwa ibyo rwasabwe, bituma u Burundi na bwo bukomeza gufunga umupaka uhuza ibihugu byombi.

Ati “Impamvu zatumye iyo mipaka ifungwa si zimwe […] hari ibyo u Burundi bwasabye u Rwanda kandi iyo mipaka yafunzwe kuva ubwo habayeho kugerageza guhirika ubutegetsi bw’u Burundi. Ku bw’ibyo rero, ibyo u Burundi bwasabye u Rwanda hari ibimaze kujya mu bikorwa n’ibindi biri kujya mu bikorwa nko gucyura impunzi.”

Mu bitarajya mu bikorwa, Niyubahwe yavuze ko igihugu cye cyasabye u Rwanda ko rwatanga Abarundi “basanzwe bari mu Rwanda bashinjwa ko bagerageje gushaka guhirika ubutegetsi mu Burundi”.

Ati “Icyo ntikirashyirwa mu ngiro ari na cyo gituma imipaka itarafungurwa.”

U Burundi busaba ko u Rwanda rwabwoherereza abantu baruhungiyemo bafatanyije na Gen Maj Godefroid Niyombare mu gushaka guhirika ubutegetsi.

Muri Gicurasi uyu mwaka, abantu barenga 30 barimo abasirikare, abanyapolitike, abanyamakuru, abo muri sosiyete sivile n’uwari umuvugizi wa Perezida Pierre Nkurunziza, byatangajwe ko bakatiwe gufungwa burundu n’urukiko rw’ikirenga mu Burundi bahamijwe kugira uruhare muri Coup d’état yapfubye mu 2015.

Aba, bose baba hanze y’u Burundi, barezwe kugerageza guhirika ubutegetsi mu 2015 no kwangiza ibya rubanda.

U Rwanda ntirukozwa ibyo kohereza abo Barundi

Ubwo Perezida Kagame yaganiraga na Jeune Afrique ubwo aherutse kwitabira Inama ku iterambere ry’ubukungu bwa Afurika, i Paris mu Bufaransa, yagarutse kuri iyi ngingo avuga ko u Rwanda rudashobora gutanga impunzi zarugannye zishaka gusama amagara yazo.

Paul Kagame yavuze ko adashobora gutanga abamuhungiyeho

Ati “Bamwe mu bagerageje guhirika ubutegetsi mu Burundi banyuze mu Rwanda mbere yo gukomereza i Burayi. Aba barimo abasirikare bakuru, Abadepite n’Abaminisitiri. Abatari bafite andi mahitamo y’aho bakwerekeza, uyu munsi bahari nk’impunzi.”

“Twabwiye u Burundi na Loni ko niba bashaka abo bantu tuzababaha ariko kizaba ari ikibazo kibareba. Ku bitureba twe ntidushobora gutanga abantu baje baduhungiyeho ahubwo icyo tugomba kwizeza ni uko mu gihe cyose bagihari nta n’umwe muri bo uzisuganyiriza ku butaka bwacu ngo atere u Burundi. Nihagira ushaka kubatwaka ngo abajyane i Burundi azirengera ingaruka. Twabibwiye Abarundi, ikindi bashaka ni iki?”

Perezida Kagame yibaza impamvu mu bagize uruhare muri iryo gerageza ryo guhirika ubutegetsi mu Burundi hari abaherereye mu Bufaransa, mu Bubiligi no mu bihugu byo muri Scandinavia nyamara Guverinoma y’u Burundi ikaba itarigeze isaba ibyo bihugu kubohereza cyangwa ngo ibigenere uko bibafata.

Kuva mu 2015 umubano w’u Rwanda n’u Burundi wazamo agatotsi, inzego zose zagiye zikora ibishoboka byose ngo ibi bibazo bikemurwe.

Mu mpera za Kanama 2020, Inzego z’Ubutasi mu Gisirikare hagati y’u Rwanda n’u Burundi zahuriye ku mupaka wa Nemba zemeranya kwimakaza guhanahana amakuru ku kintu cyose cyahungabanya ubusugire n’umutekano w’ikindi gihugu, nk’inzira igamije gukemura ibibazo by’imitwe yitwaje intwaro imaze igihe igaragara ituruka mu Burundi igatera u Rwanda.

Mu Ukwakira 2020 kandi Minisitiri w’Ububanyi n’Amahanga w’u Rwanda, Dr Vincent Biruta, yagiranye ibiganiro na mugenzi we w’u Burundi, Albert Shingiro, bagaragarizanya ubushake bwo gusubiza umubano mu buryo.

Muri Nyakanga, Perezida Kagame yohereje Minisitiri w’Intebe, Edouard Ngirente, kumuhagarara mu birori by’umunsi w’ubwigenge mu Burundi.U Burundi busaba u Rwanda kubwoherereza abakekwaho kugira uruhare muri coup d’état yapfubye mu 2015 ariko rwo ntirubikozwa kuko ngo byaba binyuranyije n’amategeko

Umupaka n’Uburundi Uzokwugururwa u Rwanda Rutanze Abashatse Gukora Kudeta

08-10-2021

Sonia Ines Niyubahwe avugira ubushikiranganji bw'imigenderanire mu Burundi — Sonia Ines Niyubahwe umuvugizi w’ubushikiranganji bw’imigenderanire(minisiteri y’ububanyi n’amahanga) mu Burundi

Umuvugizi w’ubushikiranganji bw’imigenderanire Ines Sonia Niyubahwe yemeje ko ” umupaka w’u Rwanda n’u Burundi uzugururwa u Rwanda ruhaye Uburundi abashatse guhirika ubutegetsi bw’Uburundi”.

sources: voa na igihe