Ibinini bya Covid19 byasohotse!

November 5, 2021

Abarebye: 21,300

Uruganda rwa Pfizer rusanzwe rukora inkingo za covid19 ruvuga ko ikinini cyabo gikiza covid19 ku kigero cya 89%.

Umuti ukiri mu igeragezwa ryo kuvura Covid19 wakozwe na kompanyi Pfizer yo muri Reta Zunze Ubumwe za Amerika ugabanya ubukana ku buryo uyirwaye ataremba cyane mbere y’uko agezwa kwa Muganga mu bitaro kuko uvura ku rugero rwa 89% mu bantu bakuze b’intege nke nk’uko byagaragaye inyuma yo kugeragereza uwo muti ku barwayi.

Uwo muti ni ibinini byitwa – Paxlovid – unyobwa gusa n’abantu bimaze kwemezwa ko bafite ibimenyetso bya covid19 cyane cyane ku barwayi bafite intege nke nk’abasanzwe barwaye indwara zikomeye,abashaje,cyangwa abandi banyantege nke bashobora kuremba bataragera kwa Muganga.

Uyu muti uje inyuma y’umunsi umwe urwego rushinzwe kwemeza imiti mu Bwongereza rwemeye umuti usa n’uwo wakozwe na Merck Sharp na Dohme (MSD).

Pfizer ivuga ko yahagaritse kugerageza uwo muti vuba kuko ibisubizo bya mbere byaje ari byiza cyane.

Ubwongereza bwo bwamaze gutumiza (cures) yo kwandikirwa abantu 250.000 y’uwo muti wa Pfizer hamwe n’iyindi 480.000 y’ibinini bya molnupiravir wa MSD.

Uwo muti wa Pfizer uhagarika ibyo virusi zikenera (enzyme) kugira ngo ziyongere ubwinshi. Ufashwe hamwe n’urugero ruto rw’uwundi witwa ritonavir, umara umwanya munini mu mubiri kurushaho.

Umuntu afata ibinini bitatu,incuro ebyiri ku munsi, iminsi itanu.

Umuyobozi w’iyi kompanyi Albert Bourla avuga ko icyo kinini gifite “ubushobozi bwo kurokora ubuzima bw’abarwaye, kugabanya ukurembera mu rugo , hamwe no gutuma abagera ku icyenda mu bantu 10 y’abarwaye bitaba ngombwa ko bajya mu bitaro.”

Ibyavuye mu kugerageza uwo muti

Ugukingirwa Covid -19 hakoreshwe inkingo nibyo bibonwa nk’uburyo bwa mbere bwiza bwo kurwanya icyo cyorezo ariko hari n’abakenera kuvurwa bari mu ngo zabo, cyane cyane abantu b’intege nke baba banduye.

Ibyavuye mu kugerageza uwo muti ku barwaye 1.219 b’abanyantege nke cyane bari bamaze iminsi banduye Covid byerekanye ko 0.8% y’abahawe Paxlovid binjijwe ibitaro mu gihe abagera kuri 7% bahawe umuti utari wo (placebo). Bahawe uwo muti hashize iminsi itatu bagaragaje ibimenyetso bya Covid.

Barindwi mu bahawe umuti utari wo barapfuye mu gihe mu bahawe umuti nyawo nta n’umwe wapfuye.

Abafashe umuti nyuma y’iminsi itanu ibimenyetso by’indwara bigaragaye, 1% n’ubundi yinjijwe mu bitaro ariko nta n’umwe wapfuye. Aho ni mu gihe 6.7% y’abahawe umuti utari wo bagiye mu bitaro hanyuma 10 muri bo bagapfa.

Abarwayi bageragerejweho uwo muti ni abageze mu za bukuru cyangwa basanganywe ibindi bibazo bikomeye by’ubuzima bagendana bituma bagira ibyago byinshi byo gushobora kuremba kubera Covid. Bose nta bimenyetso bikomeye cyane bya Covid bari bafite.

Dr Stephen Griffin, umwarimu kuri kaminuza y’ubuvuzi ya Leeds agira ati: “Kubona iyo miti ikora bishobora kuba bitangije igihe gishya mu bushobozi bwacu bwo kukingira abantu ingaruka zikomeye z’indwara ya SARS-Cov2 (coronavirus) kandi ni ikintu kiza cyane mu kwita ku bantu bashobora kuremba kandi bashobora kutabona urukingo cyangwa kutagira icyo rubamarira”.

Pfizer iri kwigana ubushihsozi ingaruka z’uwo muti ku bantu bandi badasanganywe intege nke n’ibyago byinshi byo kuba barembya na Covid hamwe n’abahuye n’abarwayi ba covid cyangwa babanye nabo mu nzu iwabo.