Mayotte muri 2031:Ikibazo cy’Abimukira no gutura mutuzu tutemewe(ama Banga) kizaba cyarabaye amateka

September 4, 2021

Abarebye: 5,758

Ku munsi wa 3 w’uruzinduko rw’akazi mu kirwa cy’u Bufaransa cya Mayotte (ukaba ku munsi wa nyuma kuri Minisitiri w’ubutegetsi bw’igihugu), abaminisitiri babiri ba guverinoma y’u Bufaransa ari bo Gérald Darmanin w’ubutegetsi bw’igihugu na Sébastien Lecornu ushinzwe intara za Outre mer,batangarije icyarimwe gahunda zikakaye zo kurangiza ikibazo cy’abimukira binjira mu kirwa cya Mayotte mu buryo butemewe n’amategeko hamwe n’ikindi kibazo cy’utuzu tutemewe tuzwi nk’ama Banga tumaze kwanduza isura y’icyo kirwa.

Abimukira binjira mu kirwa cya Mayotte n’ubwato bwa moteri bakunze kwita kwassa kwassa

Polisi ishinzwe imipaka izwi ku izina rya La PAF hamwe na Gendarmerie bagenzura amazi amasaha 24/24 ariko ntibikanga ababinjirana.

Imigambi yabo izabanza yemezwe mu rwego rw’amategeko mu kiswe “projet de loi Mayotte” ni ukuvuga Umushinga w’itegeko ryihariye rireba ikirwa cya Mayotte,intara y’Ubufaransa iba mu nyanja y’abahinde.

Uwo mushinga watangarijwe Kahani ku isaha ya 15h30. Nyuma y’iminota mike bari bategeje ijambo rye,abahagarariye rubanda(les élus) hamwe n’abaturage bacecetse maze Minisitiri Sébastien Lecornu abahishurira imigambi ya Leta.Yagize ati

“Kuri twe icyo turi gutegura,ni umushinga Leta ifitiye iyi ntara yanyu ko mu mwaka wa 2031,umwaka tuzizihirizaho isabukuru y’imyaka 20 Mayotte ibaye Deparitoma (Intara) y’Ubufaransa nta gasozi kazasigara kubatseho utu tuzu nk’uko twabonye hano,hariya inyuma kuri uyu musozi.Ndabibijeje kandi nicyo cyaduhurije hano !”.Amashyi ngo kaci kaci.

Si icyo kibazo gusa,kuko undi muminisitiri wari uri aho akaba ashinzwe minisiteri y’intara z’u Bufaransa zinyanyagiye hirya no hino ku isi bakunze kwita Outre-mer nawe yagize icyo atangaza kuri utwo tuzu tw’akajagari kandi tutemewe twitwa ama Banga uko bigaragara kikaba ari ikibazo cy’ingutu gihangayikishije iyo fasi.

Guhitamo kuvugira amajambo yabo aho Kahani,bufite icyo bisobanura.Aho nyine muri metero ijana gusa uvuye ku kigo cy’abatabazi banazimya muriro (pompiers) cya Kahani, préfet wa Mayotte mu mwaka ushize mu kwezi kwa 11 /2020 yahagarikiye isenywa ry’ama Banga yisunze itegeko ryiswe Elan.Ama Banga yahasenywe agera ku ijana,yari yubatswe ku butaka bw’intara bucungwa na Njyanama y’Intara (conseil départemental), ubwo butaka bukaba bugomba gutunganywa bukaba parking nziza ya za Bus zitwara abanyeshuri hirya no hino mu kirwa. Muri uru ruzinduko,Mayotte yishimiye ko aba baminisitiri babiri baza gutaha ku mugaragaro icyo kigo cy’ama Bus cyubatse neza kandi kirimo kaburimbo nziza.

HASENYWE AMA BANGA 1.000 MURI 2020

Banaboneyeho umwanya wo kwishimira ko noneho hari itegeko ridasanzwe ryatowe “ryemerera perefe gutegeka ko ama Banga yose ashatse asenywa ako kanya bitabanje gusabirwa uburenganzira ku mucamanza,bapfa kuba gusa babanje kubanza kwiga uko abari bayatuyemo bafashwa mu bijyanye n’imibereho myiza,isuku,no kwerekwa aho bateganyirijwe kuba bacumbitse igihe hakigwa ubundi buryo”,nk’uko bwana Jérôme Millet, umunyamabanga mukuru wa préfecture yabisobanuye. “Iyo gahunda idasanzwe itagira ahandi iba mu Bufaransa bwose yatanze umusaruro kuko twabashije gusenya ama Banga 1.000 mu mwaka wa 2020, mu gihe mu mwaka wa 2019 hasenywe 50 gusa.”

lutte-immigration-clandestine-bidonville-visite-ministerielle

Mu mwaka 1 gusa wa 2020 Leta yasenye ama Banga nibura 1000 kandi intego ni ukuyasenya burundu.

Yanatangaje ko mukwa mbere kwa 2021 azageza mu nteko indi nyandiko ireba Mayotte gusa kuri icyo kibazo izaba isaba ko hemezwa ko mu gihe utwo tuzu tugomba gusenywa bihita bikorwa mu masaha atarenze 96h nta gihe kigomba kongerwa nk’uko abayobbozi ba za Mairies basabaga kongerwa amasaha 48h yo kubishyira mu bikorwa.

Minisitiri Sébastien Lecornu yagize ati “ Ingengo y’imari yo gusenya utwo tuzu izakomez kongerwa na Minisiteri ku buryo nta rwitwazo ruzatangwa” kuko ingengo y’imari ya 2022 izashyirwamo amafaranga yo gusukura Mayotte ikavaho utwo tuzu. Nanone hariho gahunda yo kubaka amazu agezweho y’amacumbi meza mashya,kugira ngo bigerweho neza,rya tegeko ryiswe la loi Mayotte rigiye gushyiraho urukiko rwihariye rureba n’iby’umutungo w’ubutaka n’ibibyubatsweho (un tribunal foncier), ryongerere imbaraga komisiyo isanzweho CUF (commission d’urgence foncière) hanashingwe ikigo kizitwa établissement public du Grand Mayotte kizashingwa gutunganya ikirwa cyose,gushushanya bundu bushya ibikorwa remezo no kwegeranya ubuhanga n’ibikoresho byose bikenewe byo kubaka ku kirwa cyose ibikorwa remezo nk’iby’u Bufaransa bwa ruguru. Hari ikindi cyahishuwe kandi nacyo gikomeye muri iyo mishinga yose: “turabamenyesha ko twababoneye kandi twamaze kuvugana byose n’ikigo Action Logement kizakora ibirebana no kubaka ku kirwa cyose amacumbi agezweho,nuko tugire Ba Rwiyemezamirimo bacunga amacumbi ba kabiri muri département (intara) ya Mayotte”.

“IBINTU BIGIYE GUHINDUKA CYANE KANDI ITEGEKO RISHYA RY’UBUTAKA RIZAHINDURA IBINTU“

Ikindi kibazo cy’ingutu gihangayikishije Leta ndetse n’Intara ya Mayotte,nk’uko byavuzwe na Minisitiri w’ubutegetsi bw’igihugu bwana Gérald Darmanin ni ikibazo cy’abimukira bazengereje ikirwa cya Mayotte binjira mu buryo butemewe n’amategeko kandi bakahaba bitemewe n’amategeko .Yavuze ko icyo kibazo kitagomba guhabwa igihe,ko cyo kihutirwa kurusha ibindi byose.Abo banyakubahwa banatembereye inyanja ari nawo mupaka unahuza n’ikirwa cya Comores cyitwa Anjouan,kikaba ariyo nzira ya benshi mu binjira ku butaka bw’u Bufaransa bwa Mayotte baciye inzira y’amazi.Abo ba nyakubahwa bombi basize bakajije ingamba zo kurinda imipaka yo mu mazi no mu kirere,kandi babasezeranya ko bagiye kohereza ibindi byuma bibiri bishinzwe kubonera kure cyane abinjira mu mazi y’u Bufaransa batabiherewe uruhushya no kwiga uko bazajya bahita basubizwa iyo baturutse ako kanya. Hubatswe kandi ibirindiro bibiri bigezweho ahagana mu majyaruguru y’ikirwa bizorohereza akazi aba polisi bashinzwe kurinda urujya n’uruza rw’abinjira n’abasohoka(la PAF=police aux frontières) ndetse na Gendarmerie ku buryo bazajya bahita bakumira abinjira batabyemewe bose banyuze iy’amazi.

Undi muti usharira wavugutiwe abimukira batabifitiye uburenganzira ni uw’umushinga winjijwe muri rya tegeko ryiswe loi Mayotte uzafasha cyane mu kongerera ingufu guhagarika burundu abinjira iki kirwa banyuze iy’amazi : Gukorana amarondo yo mu mazi na za polisi na gendarmeries z’ibihugu bikunze kunyuzwamo abimukira bigakorerwa ku nkombe z’iwabo iyo,ku buryo nta kwassas (ubwato bwa vedettes bwinjiza impunzi n’abimukira mu buryo butemewe n’amategeko) zizongera kurenga umutaru; nanone itegeko ry’ubutaka rizakosorwa ku buryo nta muntu n’umwe (ndetse n’umwana) uzemererwa ubwenegihugu ataravukiye Mayotte kandi ku babyeyi bombi bahatuye nibura umwaka umwe kandi babifitiye ibyangombwa aho kuba amezi atatu nk’uko byari byanditse kugeza ubu.